«СелаӀад» журнала керттерча редактора Гаьгенаькъан Мартинай кхетаче хилар дешархошца
«СелаӀад» берий журнала керттера редактор Гаьгенаькъан Мартина, «Сердало» кепайоазон Цӏен шеф-редактор Курскенаькъан ИбрахӀим хьаьший бар Сурхо тӀарча ООШ оалача ишколе гӀалгӀай метта итт Ди белгалдеча кхетаче.
Из вӏашагӏкхетар дӀахьош, ГӏалгӀай Республикан цӀихезача хьехархочунца Ӏарчакханаькъан Сайт-Саламца цхьана дийцар «СелаӀад» журнал хьакхолларах. Хьехархочо белгалдир, цӀихезача драматурга, прозаика, поэта Чахкенаькъан Саӏида мел къахьийгар «СелаӀад» берашта, ондаргашта хьакхолла гӏерташ. Сурхо тӀарча ООШ дешархой «СелаӀад» журналаца бувзам бола дукха ха я, уж тахан а цу тӀа йоазошта кепа етташ ба, из да царна журнал эшаш а, шоай дешара даькъ тӀа накъадоалаш а хилар.
Тахан журнал эргадоалаш, дегӀадоагӀаш да. Дешархошца къамаьл деш, Гаьгенаькъан Мартинас белгалдир гӀалгӀай мотт вайна эшаш хилар, саг лерттӀа кхетам луш, ший къаман мотт, Ӏадаташ довзаш хьалкхевеча цо керттера дакъа дӀалоацаш хилар. Журнала кулгалхочо берашта дийцар тӀехьарча хана даьхача толамех, иштта «СелаӀад» журнала 40 шу дизара юкъе дакъа лаца хьийхар». Из хургда карарча шера тов бетта.
Курскенаькъан ИбрахӀима дийцар ши шу хьалха хьакхеллача сайтах. Цо белгалдир дӀахо кепайоазонца бувзам лелабара де дезар, дукхагӀа дакъа лоацаш болча дешархошта кийчдаьча совгӀатех. Юххера а, берашта делар тӀеххьара арадаьнна «СелаӀад» яха журнал, цу тӀа кепа техай юртарча берий йоазошта.
