Тӏема сийлен шахьар Магӏалбик кийчлуш я Коталон Денга
Магӏалбике, шахьара администраце кулгалхочо Боканаькъан Мухьмада кулгал а деш, болх вӏашагӏболлача комитета кхетаче дӏайихьар, хьатӏадоагӏача Сийлахь-боккхача Даьймехка тӏем тӏа Котало яьккхача денна кийчо яра хетаяь. Цига дийца керттера дош дар, тӏема сийлен шахьаре лаьрххӏа йола кхетаченаш дӏаяхьар.
«Лоархӏаме да, тӏадилла декхар кхоачашдаь а ца ӏеш, шоай вахар тӏем тӏа дӏаденна, вай маьрша кхоане бахьан бейнача бӏухой сийна, царна баркал оалаш дег чура вай цу денна кийчо яь хилар. Цунга кийчо еча комитета хӏара доакъашхо кхетаде дезаш ва, ше бехктокхаме волга хьалхашка латта декхараш кхоачашдарах», - аьлар Боканаькъан Мухьмада «Сердало» газетага.
Хьалхарча аргӏагӏа кхоачашде деза декхараш да тӏема сийленгаш малагӏча хьале да хар, иштта цӏай хиларга хьежжа хоза кийчо яр.
Магӏалбика бахархошта хоза вӏашагӏбелла болх гургба - массаза хулаш долча тӏема хьалашка кийчдаьча дааргара, кулгаговзала искусствогара къаман даарашта хетабаьча гойтамга кхаччалца.
Иштта дӏахьоргья цӏайна хетаяь яхьаш. Кхетаче дӏаяхьа вӏашагӏкхийттараша цхьацца шоашта хетараш юкъедихьар юкъарча балха.
