«Россе эпсарашца» бувзам лоаттабеш хургья Магасера депутатий Кхел
Магасе кхетаче дӏахьош хилар депутатий шахьара Кхела кулгал ду Дарсиганаькъан Хаваж-Бахьаудин, «Россе эпсараш» яхача республикерча юкъарча моттига хьалха латта Галай Руслан.
«Кагирхошца Даьхенцара лерхӏам, безам чӏоагӏбарах бола болх дӏакхахьарах дийцар цар. Россе истори, ӏадаташ лорадеш хила безилга хьалхадоаккхаш бола болх цхьана дӏахьош хилар дикагӏа, пайданегӏа хургдолга белгалдир хьакимаша», - йоах тхога бенача хоамо.
Кагирхошца болх дӏахьош дикка къахьегаш белгалваларах Галай Руслана доккха баркал кхайкадир Дарсиганаькъан Хаваж-Бахьаудина. Иштта доккха баркал аьлар депутатий Шахьара Кхела кулгалхочун гӏонча волча Гӏоандалой Ислама, Контрольно- счётни палата кулгал деча Чербажанаькъан Ахьмада.
Депутатий Шахьара Кхела кулгалхочо белгалдир «Россе эпсараш» яхача моттигерча оагӏонца дикка толамаш хилар, из хьаллоацаш грамота елар цо царна.
