Госавтоинспекце соцаваь 15 водитель машин лелае бокъо лу каьхат доацаш хилар
Аргӏанара рейд еш, Гӏалгӏай мехка гучадаьлар 15 водитель машин лелае бокъо лу каьхат доацаш хилар, иштта царех цхьа саг вар федеральни доазон тӏара лохаш, яхаш, дийцар «Сердало» газетага республикан МВД.
«Укх деношка республике МВД ГИБДД ДПС къаьсттача батальона командира декхараш кхоачашдеш волча Сапарӏаланаькъан Мовсара тӏ-адиллача декхарах дӏахьош яр Наьсарен кхален Буро кӏалха рейд», - аьлар бокъонаш лораераша. Из дӏахьош наькъа полице гучаяьккхар 161 бокъонаш толхаю моттиг. Цу закон телхадерашта юкъе дар праваш цахилар, дӏязъяь латта номераш йоацаш е кхыйола номераш лелаеш хилар, цӏеча йоагача светофорах чакхбалар, машина кораш баьддаь хилар, иштта кхыдар.
Цхьа водитель царна юкъера хьалха машин лелаяра бокъонаш дӏаяьха вар, шиъ водитель лорий тешал дезаш хилар тӏаэцаш вацар. Царех цхьаькха госавтоинспекце бокъонга хьежжа хьадехар кхоачашде лаьрхӏа вацар, цхьаькха цхьа саг федеральни доазон тӏа лохаш вар.
Госавтоинспекце болхлоша аргӏанара кхайкарал ду бахархошка; новкъа лелара бокъонаш лорае, яхаш. Из ца хилча, таро яц берригача водителий а гӏашлой а вахара кхерамзле ӏалашъе, могашал лорае.
