Гӏалгӏайчен Госфилармоне йовзийтар ашарий-гойтама проект
«Олимп» яхача хьаькъале бераш дешаш йолча лицея центре хилар ашарий-гойтама «Хозаярги Акха хӏамеи» яха программа. Из фаьлг го йиш йолаш бар йоккхача экрана тӏа, хӏаьта цун тӏехьа йоалаяьяр Гӏалгӏайчен Паччахьалкхен Хамхой А. цӏерагӏча филармоне симфонически оркестр.
Актови зал хоза кийчъяьяр, цунна хьалхашка йоаржайир тематически гойтама оагӏув. Из фаьлг дӏаболалуш, лаьрххӏа бола кӏура оттабир зале, цига геттара хоза хиннар дар, молхаш яьчара принц кӏалхарваккхара дӏахьош йола ха лоархӏаш хинна зиза-хьармакх. Из болх хоза тоабаь дӏабахьара бехктокхам тӏабиллар Госфилармоне кулгалхочун гӏонча волча Гетагӏазанаькъан Илеза.
Из проект кхоачашйир автора Минасян Армана кулгал деш. Ашарий болх дӏахьош яр Горочная Василиса, дирижёра пульта тӏа ягӏар Картанова Залина. Концерт дӏахьош цига хьожачар таро хилар чӏондарга, гобоя, контрабаса, фортепиано, кхыча гӏирсий оазашка ладувгӏа.
Кхетаче дӏахьош дакъа лоацаш бар Гӏалгӏайчен дешара, ӏилман Министерствон кулгалхо Цхьорой Ахьмад-Башир, Паччахьалкхен филармоне кулгалхо Ӏаьленаькъан Ӏайна. Цо белгалдир, цу тайпара проекташ дӏахьош хилар бахьан долаш, кхувш йоагӏача тӏехьен таро хул классически искусство йовза, царна кхыча тайпара гу, дийна оркестр локхаш хиларах, шоашта йовзаш хинна сюжеташ.
Ӏаьленаькъан Ӏайнас иштта баркал аьлар ашарашца бувзабенна болх дӏахьочарна, «Олимп» тоаба, цар иштта дика кхетаче вӏашагӏйолларах. Духхьашха дайначо самукъадаьккхар цига мел хинначар.
