Гӏалгӏайчен Паччахьалкхен филармоне хьаелл, Россе Къулбехье гӏолла дӏахьоргйола тур
Тахан дӏайолалу Гӏалгӏайчен Хамхой Ахьмада цӏерагӏча Паччахьалкхен филармоне мехка къулбехьен моттигашка гӏолла йола тур. Кхоллама тоабо ший болх дӏаболабергба Нальчикера. Ашарий театра сцена тӏа баргба артисташ, «Бека пандар, ека оаз» яхача концерта программаца.
«Программа чудоагӏаш да – гӏалгӏай иллеш, къаман мукъам, инструментальни кхолламаш, халхараш. Цар гойтаргда республикан культуран ашарий мах бар. Сцена тӏа араяргья Гӏалгӏайчен халкъа артистка, КБР, КЧР цӏихеза артистка Ӏаьленаькъан Ӏайна, ГӏР халкъа артисташ: Налганаькъан Лема, Овшанаькъан Зара, республикан цӏи хеза артисташ Йовлой Хьава, Олганаькъан Марем, Хьоашаланаькъан Лолита; филармоне солист Акхасаганаькъан Мовсар. Концерте иштта дакъа лоацаш я фолк-рок-тоаба «Дега оаз», «Гаргареи» халхара ансамбль», - аьлар «Сердало» газетага из болх вӏашагӏбеллараша.
Аргӏанара гастролаш моттигий вахаре, культуран вахаре лоархӏаме я, цо таро лу Россе Къулбехьен къамашта юкъера доттагӏала бувзамаш чӏоагӏде. Нальчике концерт дӏадолалу, цунна чудоагӏаш да Гӏалгӏайчен ӏадаташ, шоай говзал лоалахарча республикашта дӏайовзийтар.
