Гӏалгӏайчен Паччахьалкхен герба 32 шу дизад
Гӏалгӏай Паччахьалкхен герба хӏама 32 шу хьалха чӏоагӏдир мехка. Цу дийнахьа, 1994-ча шера Халкъа Гулламо цох йола бокъо хьакхеллар, республикан Президент хиннача Овшанаькъан Руслана тӏаийцар из.
Гӏалгӏай къаман исторе, философе лоархӏаме моттиг дӏалоацаш бола оагӏув хинна; чӏоагӏбелар лакха начӏал долча суртанчан Элденаькъан Руслана хьакхелла герб. Цу тӏа шерра ткъамаш доаржадаь аьрзи къаман кортамукъале, денал белгалдеш я; хӏаьта тӏема гӏала къаман архитектуран, культуран дог лоархӏаш хиннай массахана. Цул совгӏа, цо белгалъю даьй чӏоагӏале. Тӏехьашкара хьагуш да Кавказа лоамаш - даьй сийле. Маьт - лоама, Бешлоама ӏотӏахьежа малх - сийрда кхоане, къаьнара тамагӏа да массахана дуне кхесташ хилара, вахара, хӏама юха дийндалара белгало.
Гербацара хӏара хӏама ший бос, кӏоарга маӏан долаш да. Кӏай бос - нигат цӏена хилара, нийсхо хьаоттара, сийдолаш хилара белгало; сийрда - сийна бос - вӏалла а кхоачалуш йоаца сигале, баьццара бос - вай ӏалам дӏаьхий, хоза хилара, гӏалгӏай лаьтташ хьаьна, беркате хилара белгало. Цӏеча бесо хьахьокх вай къам бӏашераш хьалха денз нийсхо хьаоттаяра тӏехьа къахьегаш хьадоагӏилга, хӏаьта сийрда - ӏажагӏа бос маьлха йӏовхал, сердал, хьинар луш ба.
2001-ча шера республике керда конституционни бокъо тӏаийцар, бакъда герб, йоаггӏача беса хьакхелла хиларах, кхы хийцаяц. Тахан Гӏалгӏай Паччахьалкхен герб Паччахьалкхен геральдически РФ № 106 регистра юкъе я. Къаман селханарча вахара, таханарча, майрра гӏа баккхара деношта юкъера вӏалла хадаргбоацача бувзама белгало я из!
