Республикерча вахархочунгара, из ӏехаваь, 1, 5 млн сом ахча дихьад зуламхоша
Тийшача балхаца мехкахочунгара 1,5 млн сом ахча дихьа зуламхой лохаш ба Шолжа-Шахьарерча МВД болхлой. Из хоам «Сердалога» цу моттигера бу.
«Россе МВД МО болхлой болча латкъа венача вахархочо дийцачох, малашб ца ховча зуламхоша из ӏехаваь, шоаш дувцачох тешаваь, дукха ахча даьккхад цунгара», - йоах хоамо.
Шоай тийшаболх чакхбаккха хьожаш хиннача зуламхоша «Госуслуги», Росфинмониторинга, кхерамзлен, йоал ийяра оагӏонцара болхлой ба шоаш яьхад.
Иштта цун цӏерах кредиташ а латт, из Даьхенцара яхь ехкарех ва, яхаш, къамаьлаш дийцад.
Саг шоаех дӏатешаве гӏерташ кхестадаь хӏама да из деррига. 1 миллион 626 эзар сом ахча цунгара даккха аьттув баьннаб зуламхой. Гӏулакх хьадийлла, уж лохаш да тахан ӏаьдал.
Даггара хьакхайкадеш латт МВД болхлоша, боккъал а ма ӏехадайта шоаш зуламхошка, яхаш! Уйла е оашош леладеча хӏаман, фийла хила, ма тувса малашб ца ховча наха ахча дӏатӏа! Моллагӏа тешаме ца хетача хӏамах кхыбарашца дагадовлаш хила, ӏаьдала болхлошка хатта! Нагахьа тийшаболх хиннабале, ха ца йоаеш, сиха хоам бе МВД!
