Цӏечой Ибрахӏима Гӏалгӏайчен поалхам йовзийтар, сага бокъонех болча викалий Ерригроссийски кхетаче йолаш
Махачкале дӏайихьар мехкарча сага бокъонех болча викалий кхетаче, цига дийца керттера дош дар лаьрххӏача тӏема операце доакъашхой бокъонаш лораяр. Из кхетаче хетаяь яр Селий мехка сага бокъонех волча викала институт хьакхелла 20 шу дизара. Цунна юкъе дакъа лоацаш вар Гӏалгӏай Республикан сага бокъонех вола викал Цӏечой Ибрахӏим.
«Кхетаче дӏахьош, цо моаршал хоатташ дош аьлар, иштта баркал аьлар Селий Республикан сага бокъонех волча викала Алхасов Запир Мухтаровича, цунцарча болхлошта из кхетаче вӏашагӏйолларах, иштта бокъонаш лораяра институт юбилейца даькъалайийцар. Цига белгалдир мехкашта юкъера бувзам чӏоагӏбар лоархӏаме хилар, бокъонаш лораяра институтий, ӏаьдала болхлой, кхелахой юкъарлон болх цхьана вӏашагӏболла безилга. Кхетаче дӏахьош, Цӏечой Ибрахӏима доклад йийшар, тӏема ветеранаш хьаде хӏама долаш хургболаш института де йиш яр белгал а деш. Къамаьл деш, иштта гойтар республикан боахамашта юкъера бувзам лелабаро малагӏа пайда лу, шийна хетар аьлар СВО доакъашхой, вахара, къахьегама хьалашка бахара дича бакъахьдар белгалдеш. Из дӏалоархӏаргда кхетачен чаккхе еш», - аьлар «Сердало» газетага ГӏР УПЧ хоамий-аналитически даькъ тӏа.
Из вӏашагӏкхетар дӏадахьарах, дика таро хилар шоайла къамаьл де. Цар дийцар чоалхане хаттараш. Сага бокъонех болча викалаша цхьана кийчйир юкъара моттигаш. Уж юкъейоалайича сага бокъонаш лораяра викалий болх кхы а дикагӏча боарам тӏа баккха, цунца цхьана лаьрххӏача операце доакъашхошта, цар дезалашта сиха новкъостал лоаттаде таро хургья.
