Магӏалбика Имама, АТК викала Соагӏапчарча дешархошца къамаьл хилар
Гӏалгӏайчен Магӏалбика кхален Соагӏапчарча №8 йолча ишколе хьехама болх дӏабихьар. Из вӏашагӏбеллабар терроризма духьаларча комиссе. Кхетачен керттера хьаьший хилар - Магӏалбика кхален администраце АТК даькъа цу хаттарех вола болхло Цӏечой Руслан, Магӏалбика шахьара имам Баьтаранаькъан Ибрахӏим.
«Терко тӏаяхийтар экстремизма, терроризма хаттарашта, кхувш боагӏарашта юкъе из болх дегӏабоалабара, уж цу воча хьалах юхатохара. Цига къамаьл даьраша белгалдир, ишколо, дезало, дина викалаша цхьана из кхетам балара болх дӏахьош хилча, бакъахьа хургдар, аьнна, цунца кхувш йоагӏача тӏехьен сакхетам совбаргба, уж харцахьарча наькъ тӏа ца бала гӏерташ лоралуш хургба. Баьтаранаькъан Ибрахӏима дешархошта дийцар дин мах бола гӏулакхаш леладе дезарах, да-нана лархӏарах, хьехархочун лерхӏам барах, моллагӏа долча харц гӏулакха юстара хиларах», - аьлар «Сердало» газетага Магӏалбика кхален администраце зарбан болх лелабераша.
Цу тайпара кхетаченаш лоархӏаме я кхувш йоагӏа тӏехье дика кхетам луш кхеяра, царна дика-во хьалхадаккхара, зуламах уж лорабара. Цига дешархой а таро хул шоашта хетар дӏаала, цох нийсадар хьахозаш хила.
