«Дунен бераш терроризма духьала да» яха хоамий сахьат дӏадихьар Наьсарен РДК
Наьсарен кхален культуран Цӏагӏа «Дунен бераш террора духьала да» яха хоамий сахьат дӏадихьар. Из вӏашагӏделладар, терроризма духьала къовсам лоаттабара йолча программа чудоагӏаш. Кхетаче лаьрхӏа яр кхувш йоагӏача тӏехьенна хьалхадаккха, зуламе наькъаш малагӏаш да, царца малагӏа къовсам лоаттабе беза.
«Цу кхетаче дакъа лоацаш хилар исбахьален искусствон кружоке ӏомалураш. Цигара цар пайда ийцар, цу вахарца дувзаденнача хаттарца мишта хила веза гойташ бола», - аьлар «Сердало» газетага культуран-салоӏама урхаллене.
Хоамий сахьат дӏахьош, цига къамаьл деш хиннараша дийцар терроризмах лаьца, цхьаццаболча цунна тӏехьабаьннача наха из никъ балийна боалаш хиларах; иштта белгалдир машара, доттагӏала, тайп-тайпарча культурай лерхӏам боккха хиларах.
Къаьстта теркам тӏабохийташ дар берий сурташ. Уж кийчдаьдар ИЗО кружоке ӏомалуш долча бераша. Исбахьален балхаш даьдар сийрдача басарашца, дег тӏарча уйлашца, цар хьагойтар машара оагӏув, дукхача къамий культураш, сага вахаре мах бараш.
