Гӏалгӏай мехка хоржамий болх дӏабахьара кийчвеш ва 400 совгӏа теш
Гӏалгӏай Республике дӏаболабир, карарча шера тов бетта Цаӏ долча кхадж тоссача дийнахьа хоржамий болх дӏабахьара гӏончаш кийчбара болх.
Юххьанцара, хургбола юкъарлон болхлой, тӏахьожамхой ӏомабеш; балха оагӏув дӏайолайир Магӏалбика кхален Соагӏапча. Программа дӏахьош бар лакха балха говзал йола тренераш: ӏамарханаькъан Лейла, Хамхой Марет, Малсаганаькъан Хьанифа. ӏомабара оагӏув вӏашагӏъеллар я Юкъара палата, юкъарлон тӏахьожама Штабаца цхьана.
Укх шин кӏира уж курсаш дӏахьоргья Гӏалгӏайчен доал деча даькъ тӏа. Кампане лаьрхӏад 400 совгӏа кийчваь говзанча хилийта, цу юкъе дукхагӏбараш студенташ болаш.
«ӏомавалара болх дӏахьош, къаьстта йола терко лоаттаю «Юкъарлон тӏахьожама балха», беррига кхадж тассара болх кердабоаккхаш, иштта чоалхане юридически хьал къоастаде ӏомалуш.
Курсашка ладувгӏараш ӏомалу, нагахьа санна кхадж тоссача даькъ тӏа цатоам этта моттиг хуле, болх юха ца соцабеш, лерттӏача къамаьлаца цу даькъ тӏара хьал нийсде», - аьлар цхьан тренера.
Уж ӏомабу моттигерча Штаба хьехархоша, уж шоаш федеральни эксперташа Лукаш Антона, Тихов Дмитре кулгал а деш, Владикавказе шоай балха говзал лакхъяь ба. Хьехамчаша лакха мах оттабир гӏалгӏай хьехархоша хьаийцача балха говзала.
Шоаш курсашка ӏомадаьр цар юкъедоаккх къаьстта кхадж тоссача деношка. Цар керттера декхар да, кхадж тассара болх къаьга, цӏена хилийтар, хӏара хоржамий даькъ тӏа закон лорадар. Теша лов уж говзанчаш юкъе болаш дӏахьош бола хоржамий даькъ тӏара болх, тов бетта кхадж тасса боагӏача бахархой тешам чӏоагӏбеш хургхиларах.
