«Тӏаргам» яхача XVӏӏӏ Ерригача Россе кагирхой кхетаченга кийчо еш ба мехка
«Мужече» оалача спорта кийчо еча моттиге укх аьхки 18-гӏа дӏахьоргья начӏал дола кагирхой тӏаозаш йола Ерригача Россе «Тӏаргам» яха дешара кхетаче. Мехкарча 40 моттигера 150 совгӏа саг ва гуллургвараш. 900 совгӏа чуденна дехараш тохкаш болх дӏабихьаб цу оагӏонца тахан. Эггара толашагӏа ба аьнна хетараш ба хьакъоастабаьрш.
«Юкъарча программе болх беш хургба укх шера беррига доакъашхой, бекъабенна боацаш. Лекцеш, гойтама балхаш, чемпионаташ, тоабанцарча проектий балхаш, иштта кхыдараш чулоацаш я из моттиг. Начӏал долча кагирхоша вӏаший пайда эцаш, шоашта ховр доаржадеш къахьегаргдола кхетаче я из.
Культуран, спорта оагӏонашцара кхетаченаш хургья цига мехка чӏоагӏденна латта ӏадаташ, гӏулакхаш лорадеш. Республикан, федеральни оагӏонца йоаржае йиш хургйола проекташ йовзийтаргья кагирхошта. Россе бахача кагирхошта шоай начӏал доаржаде аьттув луш йола моттиг хиннай тахан Гӏалгӏай Республиках», - дийцар «Сердалога» мехкарча Паччахьалкхе.
«Тӏаргам» яха кхетаче йоккха моттиг дӏалаьца я тахан республикашта юкъера бувзам чӏоагӏбеча, вахаре лоархӏаме йола проекташ йовзийтача, пайда хургбараш дӏа-хьа эцача.
