Гӏалгӏайче кийчлуш я «Халхар - дунен мотт» яха фестиваль дӏаяхьа
Гӏалгӏайче кийчо еш я Республикан ХV-ча берий-ондаргий халхарий тоабай, шин сага халхарий, «Халхар- дунен мотт» яха фестиваль дӏаяхьарга. Карарча шера из культуран моттиг лоархӏаме я, хӏана аьлча из дӏахьош я Россе халкъа цхьоагӏон Шера чуйоагӏаш хиларах.
«Из доккха цӏай вӏашагӏдоллаш къахьегар я Гӏалгӏайчен культуран, туризма Министерство, иштта халкъа кхоллама, культуран кхетачений Республикан цӏа. Фестивала кертте латтар да халхара искусствон мах бараш лорадар, иштта къаьсттача халхарчий говзал лакхъяр», - аьлар РДНТ кулгалхочо Зурабанаькъан Ахьмада «Сердало» газетага.
Проект укх массехк шера хьаллоацаш я кхоллама начӏал дола бераш, цо таро лу къаман культура лораеш, ноахалашта кхетам бала.
Из кхетаче дӏахьош гуш хургда халхара метто наьха дегаш мишта вӏашагӏтох, хургдолча ноахала культуран тӏехьале лораеш.
