Гӏалгӏайче, СКФУ дукха оагӏонаш йола бувзам чӏоагӏбеш я
ГӏР Кулгалхочо Келаматанаькъан Махьмуд-Ӏаьлас, Къилбаседа Кавказа федеральни университета ректора Шебзухова Татьянас бувзам лелабе бартчӏоагӏам бир, яхаш, дувц «Сердало» газетага республикан кулгалхочун зарбан-болх лелабераша.
«Бартчӏоагӏам бир цхьана болх дӏабахьа, республикай дешара, лакха говзал йола болхлой кийчбеш. Цунна чудоагӏаш да тахан эшаш йолча балха оагӏон говзанчаш кийчбар, къаьстта уж балха говзалаш ӏомаяр. Уж Гӏалгӏайчен вузашка йоацараш я. Иштта лаьрхӏад экономикан, вахара доакъой, иштта ӏаьдала балха говзанчаш кийчбара дикал лакхъе», - аьлар Макшарипа Махьмуд-Ӏаьлас, бартчӏоагӏама мах беш.
Дӏахо цхьана дӏаяхьа лаьрхӏад ӏилман проекташ, цо новкъостал дергда уж юкъеяхара, кхоачашъяра, вузашта юкъера бувзам лелабара, дешархой профессиональни даькъ тӏа болх дӏабахьара, иштта кагирхошта ловш дола тайп-тайпара хаттараш кхоачашдара, дешара кхетаченаш дӏаяхьара.
Мехкадас аьлар, цу хьакъехьа лоархӏаме да Гӏалгӏайчен кагирхошта дикал йола дешар ӏалашдар, дика професси караерзаяр, дӏахо шоай къахьегама никъ дика дӏабахьар.
«СКФУ – дика новкъост я, тхо тешаш да, цу бувзамах боккха пайда баргба аьнна», – белгалдир ГӏР Кулгалхочо.
