Гӏалгӏайче, федеральни куран тӏа, дикагӏа наькъаш дола мохк ба
Наькъаш тоадар мехка эггара лоархӏамегӏа дола декхар да, яхаш, дийцар «Сердало» газетага ГӏР автомобильни наькъий, транспорта Министерстве.
«Республике тоадаьд дикал йолаш 100 км гаргга наькъаш. СКФО гӏолла Гӏалгӏайче хьалхара моттиг йоаккхаш я, Россе гӏолла - йиълагӏа моттиг, наькъа дикалга диллача», - аьлар премьер-министра Сластенин Владимира, ше ГӏР Халкъа Гулламе 2025 шера баьча балхах дувцаш.
Дӏаяхача хана цу балха даькъ тӏа даьр дукха да. Транспорта даькъ тӏа доаллаш хинна (9,2 млн сом) «Ингушавтотранспорта» декхар дӏаделар, нах дӏа-юха кхувлара бола мах гулбаьб шозза дукхагӏа, керда 13 маршрут юкъеяьккхай, берригаш а дӏа-юха бига нах 4,5 млн саг ва.
Цул совгӏа, таханарча транспорта даькъ тӏара хьал дегӏадоаладеш, балха юкъеяьккхай электромобилашта зарядка еш йола ворхӏ станци. Карарча шера цу тайпара итт керда технически хьал юкъедаккха лаьрхӏад.
Белгалдаккха деза, Гӏалгӏайчен наькъаш хӏара шера тоадеш латт, царца да керттера доккха наькъаш; республикан чухьара шахьараш, юрташ вӏаший ювзараш.
