Москверча муниципальни кхетаче, бӏаь совгӏа дехар чуденнад вай республико
Вай мехкадас Келаматанаькъан Махьмуд-Ӏаьлас лоархӏаме я аьнна белгалъяьча Москверча муниципальни кхетаче дакъа лоацаш, бӏаь совгӏа дехар чуденнад республико. «Зӏамига Даьхе - Россе низ» яха Ерригача Россе ӏӏӏ муниципальни кхетаче дӏайихьар Москве.
«Къахьегар» яхача Ерригача Россе муниципальни преме лауреаташ белгалбир цига. 2024-ча шера «Къахьегар» яхача преме дакъа лоацаш россиянаша 63 эзар совгӏа дехараш чуделар.
«Эггара лоархӏамегӏа дар цига «Даьхен гӏулакхе латташ денал, турпалал гойтар» яхача оагӏонца белгалбалар. Из духхьал преми хинна ӏац, боккхача мехка хӏама тоадара тӏехьа хьинаре, бехктокхаме къахьегаш хьабоагӏарашта терко яр дар из. Россе Президента Путин Владимира белгалдир, наха хьо лархӏар, хьох тешар къаьстта муниципалитеташка чӏоагӏлуш долга. Цу яхьашка дакъа лаьцар вай республико а.
Илдарха-Гӏалий тӏарча администраце 54 дехар чуденнад, царна юкъера 28 дипломанташ хилар. 51 дехар дар Наьсарера чуденнараш, Наьсарен кхален моттигашкара чуденнача 26 дехарех 9-х дипломаш делар», - белгалдир вай мехкадас Келаматанаькъан Махьмуд-Ӏаьлас.
Мехкарча муниципалитеташка хьинаре, бехктокхаме къахьегаш бола нах белгалбеш, цар толамаш гойташ йола цу тайпара яхьаш чӏоагӏа лоархӏаме йолга теркалдир республикан Кулгалхочо.
Бахархошта цхьацца кхоачамбоацараш къоастадара тӏехьа дешаца, гӏулакхаца новкъостал деш ба уж. Федеральни оагӏонца уж белгалбар, цар къахьегама хам бар дӏахойодача хана шоай гӏулакх кхы а дикагӏа дӏадахьа дог ураоттадеш, низ чуболийташ да.
