КИФ-2026 дӏахьош, Гӏалгӏайчено ший проекташ, таронаш йовзийтаргья
Дӏадоладелар Кавказа инвестиционни кхетачен-2026 балха хьалхара ди. Лоархӏамеча, боккхача гулламе дакъа лоацаш ба Гӏалгӏай мохк, яхаш, дийцар «Сердало» газетага ГӏР Кулгалхочун зарбан-болх лелабераша.
«Республика дегӏайоалаяра, инвестицеш юкъеяхара, бизнес хьаллацара, йоккхий социальни проекташ кхоачашъяра из дика майда я. Къилбаседа Кавказа из кхетаче мехкашта, федеральни центра, гӏулакхерча юкъарлонна юкъера къамаьл дӏадахьара дика таро я», - аьлар республикан кулгалхочо Келаматанаькъан Махьмуд-ӏаьлас.
Цига дакъа лаца тарлуш ба РФ премьер-министр Мишустин Михаил, вице-премьер Новак Александр, СКФО гӏолла РФ Президента викал Чайка Юрий, федеральни министерствай кулгалхой, бизнесменаш, эксперташ.
Гӏалгӏайчено гойтаргья ший дегӏаяра нийса оагӏонаш, вахара юкъейоахаш йола проекташ, инвестицей таронаш.
«Керттердар да, цу кхетаченна РФ Президента Путин Владимира терко лоаттаеш хилар. Къаьстта цу тайпара майдаш вӏашагӏйохкаш хиларца, таро хул доазонаш дегӏадоаладара хьал тоаде», - аьлар Макшарипа Махьмуд-ӏаьлас, республикан вахара-экономически оагӏорахьа де лерхӏараш белгалдеш.
Цо иштта аьлар, Кавказа инвестиционни кхетаче, экономика дегӏайоалаяра дӏайохийтача тайп-тайпарча таронашца, инвестицешца дика таронаш хьаелл бахархошта, предпринимательства даькъ тӏа, экономикан тайп-тайпарча боахамашка.
