Гӏалгӏайче дакъа лоацаш хилар «Таьрахьий Кавказ» яхача хоамий кхерамзлен кхетаче
Гӏалгӏай Республикан викалаш бахар «Таьрахьий Кавказ» яхача хоамий кхерамзлен кхетаче дакъа лаца. Из вӏашагӏъеллар я хоамий оагӏув дегӏайоалаяра Институт, из дӏайихьар Селий мехкарча хоамий, зарбан Агентствос хьал а лоацаш, «Каспий» оалача санаторен-курорта даькъ тӏа.
Цу кхетачено Къилбаседа Кавказа моттигашкара баьхкача журналисташта, блогерашта, юкъарлон болх лелабечарна, ӏаьдала викалашта, эксперташта таро елар лоархӏаме къамаьл де, къаьстта экстремизма духьаларча балхах лаьца. Вай мехкара цу кхетаче бар Гӏалгӏай Республикан Кулгалхочун, Паччахьалкхен чурча политикан Урхалленцара нах; Гӏалгӏай Республикан арахьарча бувзама, къаман политикан, хоамий, зарбан Министерствон болхлой; иштта «Сердало» яхача кепайоазон цӏен журналисташ.
Гулбеннараша дийцар хоамий кхерамзленах, харцдараш юхатохарах, хоамий даькъ тӏа экстремизма, терроризма духьалара болх дабахьарах. Къаьстта йола терко тӏаяхийтар хоамий темашта.
Цига дийцар таханарча дийнахьа ира латташ дола хаттараш. Кхетаче дӏахьош хиннача шоллагӏча дийнахьа уж проекташ гойтар даькъ тӏарча кхелахошта.
Кхетаче чакхъяьлар, беррига доакъашхой цхьан шун тӏа вӏашагӏкхийтта, цига «Керда хоамаш дегӏадоаладара института» кулгалхочо Эльдаров Имама доакъашхошта совгӏаташ делар.
«Сога хаьттача, цу вӏашагӏкхетаро дика пайда лургба, дукхаза накъа а даргда Кавказе хоамаш доаржадара кхерамзлен оагӏув хьакхоллаш хилар.
Сона хет, вай кӏеззига цул тӏехьадусаш санна. Хьакхолла еза воай доалахьара оагӏув, иштта лакхбе беза инвестицеш вай мехка тӏахьехара бола болх.
Баркал ала лов из болх вӏашагӏбелларашта, цу тайпара цӏихеза нах бовзарах, цу проекта даькъ тӏа тхоашта карагӏдоалар кхетадарах», - аьлар Гӏалгӏайчера цига дакъа лоацаш хиннача, «Вай аматаш» яхача журнала керттерча редактора Курскенаькъан Ибрахӏима.
