Гӏалгӏай мохк дакъа лоацаш хилар, спортивни диктант яздеча
Гӏалгӏайчен 200 гаргга вахархо дакъа лоацаш хилар, Ерригроссийски спортивни диктант яздеш. Из боккха болам вӏашагӏбеллабар спорта Министерствос, Россе Олимпийски комитето. Из дӏадихьар мехка гӏолла 1400 майдан тӏа. Вай республике диктант дӏахьош дар Йовлой Берда цӏерагӏча «Магас» спорта Цӏагӏа, аьлар «Сердало» газетага Гӏалгӏайчен спорта Министерстве.
Спорта Цӏен парташ тӏа хайшар профессиональни спортсменаш, тренераш, спортивни боахамий кулгалхой, иштта унахцӏенон вахар леладеш бола бахархой.
Диктант яздеш хьалхашка лаьтта декхараш дар дунен, мехка спорта керттерча ханашца, Олимпиада истореца дувзаденнараш, физкультуран керттердараш, тайп-тайпара ӏилмаш довзийта хар.
Дешара хьал дӏахьош, дика дакъа лоацаш хилар Магаса, Шолжен, Илдарха-Гӏалан, Магӏалибика, Тӏой-Юрта ишколаш, колледжаш. Цига кийчйир диктант яздара моттигаш.
Ерригроссийски спортивни диктант хӏанз шозлагӏа яздеш да. Из лаьрхӏа да унахцӏена вахар бахархошта юкъе доаржадара, цох нах мишта кхет хара, спортивни даькъ тӏа царна ховш дар дикагӏа дегӏадоаладара.
