«Къаман кросс - 2026» яха Ерригача Россе адара ди хьаллоацаш ба мехка
Укх бетта 26-ча дийнахьа дӏаяхьа лерхӏа «Къаман кросс-2026» яха Ерригача Россе адара ден хетаяь спортивни кхетаче хьаллоацаш хургба вай мехка. «Магас» Йовлой Берда цӏерах йолча спорта ЦIагIа хургда из болх вӏашагӏболлар. Кадай, унахцӏена дола вахар хьаллацарах долча цу гӏулакха юкъе дакъа лаца бех беррига бахархой.
«Сердалога» Минспорте беча хоамах, бовда къоастадаь доазош доакъашхой ханашка хьежжа хургда – 500 метрага кхоачаш къонабарашта, 3 км- боккхагӏбарашта.
Дакъа лаца йиш йолаш ва спорт езаш мел вар, хӏаьта 17 шерга кхачанза барашка лорашкара каьхат хила деза, дакъа лаца йиш хилара тешал деш. 18 шерга кхаьчарашка е лорагара каьхат хила деза е шоаш кулг яздаь дакъа лоацаргда цар цига. 1 – 3-гIа моттигаш яьхарашта яла кийчъяь кубкаш, майдилгаш, грамоташ я.
