Гӏалгӏайче дакъа лоацаш яр, Хьалхарчар Ерригроссийски хьехамчаш вӏашагӏкхетача
Магӏалбик-Шахьара Гӏалгӏай унахцӏенон колледжа кулгалхочун гӏонча Котанаькъан Малейкхан Гӏалгӏайчера викал яр, Москве дӏахьош йолча «Дегаш вӏашагӏтохаш» яхача Хьалхарчар хьехамчий Ерригроссийски кхетаче, яхаш, дийцар «Сердало» газетага «Хьалхарчар болама» говзанчас Налганаькъан Рамзана.
«Тӏема сийлен Шахьара хьехархочун таро хилар, Россе ерригача моттигашкара баьхкача хьинар долча 100 совгӏа болча хьехамчашта юкъера цӏихеза говзанчаш бовза, столицан сийлен моттигашка яха, иштта берий юкъарло хьакхоллара хаттараш тахка. Кхетачен чаккхе еш, цига дакъа лоацаш хиннараша вӏашагӏъеллар пайда луш йола федеральни юкъарло», - аьлар хоамо.
Цу кхетаченах дувцаш Котанаькъан Малейкхана дийцар, из дӏаяхьар цхьаькха толам ба, моттигера тоабаш дегӏайоалаяра, иштта наькъа карта хьакхоллара, кхувш йоагӏа тӏехье цу юкъеяккхара йола таронаш я уж, яхаш.
