«Селханарча доккхача истореца дувзаденнар» яхача ӏилман конференце дакъа лаьцар вай мехко
«Селханарча доккхача истореца дувзаденнар» яхача къамашта юкъерча ӏилман кхетаче дакъа лаца йийхар «Тӏехьале» яхача гӏишлонхой ишкола тоаба, цун кулгалдеш вола Султиганаькъан Рамзани археолог Мадуров Дмитрийи волаш. Из хоам «Сердалога» бир цу моттига зарбан болх лелабераша. «Археологех йолча РАН института Москве дӏайихьа из кхетаче лоархӏаме хилар «Тӏехьале» яхача вай ишкола. Цига дакъа лацарах, Россерча а иштта доазол арахьарча а гӏишлонхошца бувзам чӏоагӏбе аьттув баьлар вай мехкахой», - дийцар тхога.
«Иштта йолча, тайп-тайпарча моттигашкара гӏишлош меттаоттаеш бола говзанчаш гулбеннача моттиге дакъа лацар дикка пайда беш хул. Исторецара кхерах я моттигаш меттаоттаеш долча тхона довза дезараш, оаха шаьрде дезараш дукха да. Цу конференце оаха массане кхетадир, археологашца, историкашца, къаьнара гӏишлош меттаоттаеш болча болхлошца бувзам хилар мел эшаш, говзал лакхъеш хӏама да.
Исторически моттигаш юххьанца шоаш хиннача тайпара меттаоттаяр яхар чӏоагӏа кӏоарга, из гӏулакх довза дезаш хӏама да. Цхьаццаболча доакъашхоша белгалдир, тха болх шоашта бовз, аьнна.
«Культура», НТВ, РЕН ТВ, иштта кхыйолча федеральни каналашка гӏолла тха болх бӏаргабайна, бовзаш бар уж. Ма дарра аьлча, тха дог ураоттадеш, низ чуболийташ кхетаче хилар цох», - дийцар тхога Султиганаькъан Рамзана.
