«Цаӏ йола Росси» яхача парте XXӏӏӏ Съезда доакъашхо я Гӏалгӏайче
Республикан кулгалхо вола Келаматанаькъан Махьмуд-Ӏаьла хьалха волаш, «Цаӏ йолча Россе» XXӏӏӏ Съезде дакъа лоацаш хилар вай мехкара викалаш.
Боккхача мехка, моттигашка хӏама тоадара наькъех дувцача лоархӏмеча кхетаче дакъа лоацаш хиннараш Россера 4000 совгӏа саг вар. 2026-ча шерарча федеральни хоржамий кампане юхьиг я ала мегаргдолаш, болх бар из.
Керттерчарех да аьнна къоастадир хила дезача Паччахьалкхен Думан хоржамашка партегара дакъа лоацаргдараш белгалбар, иштта Къаман программаца дувзаденнараш чӏоагӏдеш болх дӏабахьар. Ший къамаьла юкъе Россе Президента Путин Владимира мехка хьал тоадеча наькъ тӏа эггара лоархӏамедараш белгалдир: кхерамзлен хьал боаггӏача боараме хилийтар, технологически, экономически оагӏонашцара болх толамца дӏабахьар, бахархой хьал тоадара тӏехьа дикка къахьегар. Къаьстта терко еш дийцар Съезде тӏема операце доакъашхоех, хӏана аьлча уж нах тахан Даьхен хӏама лорадарал совгӏа юкъара-политически оагӏонца къахьегаш, партегарча кандидаташта юкъе болаш, Къаман программа йоаржаеча дакъа лоацаш ба.
Вай мехкара цу лоархӏамеча кхетаче дакъа лоацаш хиннараш бар РФ сенатораш Илезанаькъан Микаил, Хамченаькъан Билан; Паччахьалкхен Думан депутаташ Бӏарахой Бек-хан, Татренаькъан Муслим; Мехкадаь, Паччахьалкхен Администрацена хьалха латта Мархенаькъан Анзор, иштта парте моттигерча оагӏонцара, юкъарча моттигий викалаш.
«Цаӏ йолча Россе» балхаца лоархӏаме моттиг дӏалоацаш я бахархой хьашташка гӏолла хьакхелла йола Къаман программа. Цу программага гӏолла дукха дикаш доаржаде аьттув баьннаб тахан вай мехка а: гӏишлош хьалъяр, дешара, унахцӏенон оагӏонашцарча моттигий гӏулакх тоадар, дезалашта гӏо дар, бахархой вахаре лоархӏамедараш меттадоаладеш къахьегар, иштта кхыдараш а.
Мехка хьалхашка латташ дола керттера декхараш белгалдир Съезде, иштта Россе Президента Путин Владимира къоастадаьрашка гӏолла дӏабахьа безача балхах дийцар», - йоах вай мехкадас Келаматанаькъан Махьмуд-Ӏаьлас.
