Халача хьале эттача Селий мехкарча наха, 1 млн сом ахча дахьийтар Санкт-Петербургерча гӏалгӏаша
Санкт-Петербургерча «Дагестан» яхача культуран оагӏонцарча моттиге вӏашагӏкхийтта хилар вай къаман нах, СЗФО Селий къаман республикера массазара викалаш. Хий чухьадарах халача хьале эттача наьха оагӏув хьаллоацаш, ахча гулдир вай къаман наха.
Гӏалгӏай викалашкара, вайца тхьоврача хана денз вошал долаш хьадоагӏача селий къаманна, 1 миллион сом ахча делар. Ахча дӏаденнараш бар СЗФО Гӏалгӏайчен массазара викал Овшанаькъан Муслим, «Зикр» яхача оагӏон кулгал ду Хазанаькъан Мухьмад. Селий къаман массазарча викала Гасанов Гасана, культуран оагӏонцарча моттиге имам волча Темирбулатов Казим-хьажас доккха баркал аьлар тахан гӏо деш уллув эттача гӏалгӏай къаманна. Цхьана ламаз даь, дуӏаш дир цар Даьлагара шоай хьал аттачахьа даккхар дехаш. Гулъяь хӏамаш, ахча халача хьале эттача нахага дӏакхоачадергда. Кхетачен доакъашхоша белгалдир, нах дӏахо а гӏо лоаттаде кийча болга.
Ишттача гӏулакхо хьагойт, моллагӏа хало тӏаеча Кавказе дахаш дола къамаш вӏаший тӏаотташ, шоайла вошал леладеш, тхьовра денз хьабоагӏа бувзам лорабеш долга.
