Кхетам гойтача яхье белгалбаьлар вай мехкахой
«Профсоюзаши кагирхойи. Истори, кердадараш» яхача кхетама боарам гойтача мехкашта юкъерча яхье белгалбала аьттув хилар «Гӏалгӏай мехкара профсоюзий цхьанкхетар» яхача Кагирхой Союза оагӏонцарча тоабан доакъашхой. Яхь дӏайихьар Буро тӏа.
«Ерригача Россе кагирхой Денна хетаяь йола из турнир Буро тӏарча Союзий Двореце хилар. Къилбаседа Кавказа республикашкара кагирхой бар ше-ше котвала гӏерташ хиннараш. Тоабанца болх бе хар, уйла сихха еш хилар, кхетама хьал гойта дезаш бар уж цига. Ялх сагах латташ хиннача гӏалгӏай тоабан доакъашхой белгалбаьлар цу дийнахьа. Пхе оагӏонах латташ долча ловзара юкъе яр викторина, «Брэйн-ринг», «Фу? Мичахьа? Маца?», иштта кхыдараш а. СКФО тоабашта юкъе кхоалагӏа моттиг йоаккхаш белгалбаьлар вай мехкахой. Капитаний («Ший ловзар») яхача къовсаме шоллагӏча моттиге эттар уж. Жоп нийса луш, кадай кхастарах «Брэйн-ринге» котало яьккхар цар», - дийцар тха газетага вай мехкарча цу оагӏонцарча Союза зарбан болх лелабераша.
Иштта вай мехкахоша «Фу? Мичахьа? Маца?» яхача ловзаре «Доттагӏала Кубок» яьккхар. «Толамца даькъалабувц вай кагирхой! Профсоюзий болама хӏама тоадеш, уж къахьегаш болга гуш да тахан. Дӏахойодача хана а, иштта толамаш доахаш дӏачакхбала аьттув, низ хилба цар», - белгалдир мехкарча профсоюзий Цхьанкхетара хьалха латтача Оздой Хаде.
