«ӏа 2026» яхача Москверча Клубий лиге белгалбаьлар вай футболисташ
ЦСКА академера къона футболист Томбенаькъан Керма, «Космос» яхача футбольни тоабанцара Баркинхой Мухьаммад дикка белгалбаьлар Москве дӏайихьача «ӏа 2026» яхача Клубий лиге. Из хоам «Сердалога» бир футбола федерацера.
«2014-ча шерарча футболистий «Б» тоабаш яр ловзаш хиннараш. 39-ча миноте духьаллаттарий наӏарашка бургац чутоха аьттув баьлар Кермий. Из лакха начӏал, говзал йолаш хиларах 3:1 йолаш котало яьккхар москвичаша. Футболиста юххьанца беркате, дикка ше дӏавовзийташ дола шу хилар укхох. Дикка белгалваьннарех ва тахан Мухьаммад а. Котало яьккхаеце а, 30-ча, 43-ча миноташка бургацаш чутоха аьттув хилар цун. Кхелахоша дикка теркалдеш, ловзар юхасаццалца чӏоагӏа къахьийгар вай мехкахочо», - дийцар тхога футболах йолча федераце.
ЦСКА яйгача атлетиках йолча моттиге хинна футбола къовсам чакхбаьлар фусам-даьша котало йоаккхаш (5:3).
«Гӏалгӏай футбола ишкол дӏайовзийташ хинна вай мехкахой белгалбаьлар цига. Кхелахоша зийра, тоабан юкъе цар шоай гӏулакх дизза, деррига а шоашта хьатӏаэца кхераш боацаш чакхдаьккхалга. Гуш дар, вай футболисташ кийчо яь болга», - дийцар тхога футбола Федерацена хьалха латташ волча Хьулахой Хаважа.
