Гӏалгӏайчен футболист Мархенаькъан Адам юха а белгалваьлар дика ловзарца
Гӏалгӏай футболиста Мархенаькъан Адама юха а ший спортивни говзал гойтар немций «Нюрнберг» ФК чувоагӏаш, хоам бу «Сердало» газетага Гӏалгӏай Республикан футбола Федераце.
«Эльферсберг» ФК духьала цӏагӏара къовсам дӏахьош, Мархенаькъан Адам вӏашагӏкхетар чакхдаллалца ловзаш хилар. Чаккхе еш, кхелахоша цун балха мах оттабир 6,9 балл. Цун карагӏдаьлар 96% нийса бургац дӏаялара оагӏув лелае – 49-нех шиъ мара нийса йоацаш хиланзар. Цо иштта 75% дика, кхычарга дӏа ца кхоачийташ, бургац лелайир; цо кхозза гобаьккхар, бургац дӏа ца кхоачийташ, кхоззе а котваьлар. Кхетаче чакхъяьлар чот 3:2 йолаш, «Нюрнберг» ФК оагӏорахьа толам болаш», - аьлар хоамо.
Тхога хоам баьчо яхачох, цу коталоно таро елар Мархенаькъан Адам юкъе волча тоабанна къовсамий бархӏлагӏча мугӏаре хила.
«Адамо цига дакъа лацарах цӏаькхаза а хьагойт из цу тоабанна эшаш хилар: бургац нийса лелае харо, цунна таро лу ловзара юкъе керттера дакъа лоацаш хила», - аьлар Гӏалгӏай Республикан футбола Федераце президента Хьулахой Хаважа.
