Гӏалгӏай футболист Мутаӏаланаькъан Аслан гуржий клубе ловзаргва
«Мерани Мартвили» яхача гуржий клуба юкъе хургва хӏанзчул тӏехьагӏа вай футболист Мутаӏаланаькъан Аслан. Из хоам «Сердалога» бир мехкарча футболах йолча Федераце.
«Кердача ловзарашка кийчо еш йолча тоабанца ва карарча хана Аслан. Клубаца цхьан шера бартчӏоагӏам оттабеш, болх чакхбоаккхаргба цо кастта. Гуржий тоабан юкъе, ший новкъостаца Хамхой Хазбулатаца цхьана ловзаш хургва из. Хьалхагӏа Пермерча «Амкара» юкъе волаш, ловзаш хилар уж шаккхе», - йоах тхога бенача хоамо.
«Мерани Мартвили» яха футбола клуб Гуржий мехкарча чемпионата Хьалхарча лиге дакъа лоацаш я. Укх шерара цун ловзараш дӏадолалургда тушола бетта 1-ча дийнахьа. «Гори» футбольни тоабанца ловзаргья из эггара хьалха.
Белгалде деза, вай мехкахо Гуржегӏа кхачале «Волга» яхача нижегородски тоабан наӏарашка латташ хиннилга.
