Илдарха-Гӏала ший 31 шу дизар дездеш хилар
Республикан эггара къонагӏа йола шахьар – Илдарха-Гӏала тахан ший 31 шу дизар дездеш хилар. Шахьарерча Сийлен парке, цу гӏулакха хетадаь, доккха цӏай дар дӏахьош. Бахархой цу Денца даькъалабувцаш, къамаьл дир мэр волча Дидиганаькъан Ахьмада.
«Шахьара ди яхар эггара хьалха бахархой, укхаза малхабаьнна хьалкхийнача, цкъа хьавена массаза укхаза ваха нигат даь ӏийначун, Илдарха-Гӏала езачун Ди да. Шахьара хьал тоаде гӏерташ, хӏара денна къахьегаш барашта доккха баркал оал аз! Дикача оагӏорахьа тоалуш, беркате хувцамаш хулаш; ваха, къахьега, дезал кхебе, кхоанен лаьрхӏа гӏулакхаш кхолла безам хургбола шахьар хийла укхох массахана! Иразе, беркатаца, гӏозаленца, могаш-маьрша болаш бахалба шахьара бахархой!» - аьлар Дидиганаькъан Ахьмада.
Мэра белгалдир, шахьаре эггара безагӏа, боккхагӏа лоархӏараш цун бахархой болга. Ӏуйран денз Сийлен парке йоаржаяь, вай мехкарча тайп-тайпара балхаш шоай кулгашца хьакхоллача говзанчий ярмарка яр, иштта спортацара яхьаш яр дӏахьош. Дукха адам гулденнадар цига, шахьара Ди дезде. Боккхийбараш, бераш, хьаьший – берригаш дегаш гӏоздаьнна, цу гӏулакхаца сакъердалуш бар.
