Гӏалгӏайчен Паччахьалкхен драмтеатр кийчлуш да, «Къонгаш бовча хана» яха спектакль гойта
Гӏалгӏай паччахьалкхен Боазаркъанаькъан Идриса цӏерагӏча театре укх деношка кхоллама болх- дӏахьош ба, Чахкенаькъан Саӏида «Къонгаш бовча хана» яхача пьесах оттаяьча спектакла репетицеш еш. Из хетабаьб вай къамо турпалал гойташ дӏайихьача ханах болча дагалоаттама. Гӏалгӏайчен халкъа артист Галай Мурат, режиссёр-оттаяьр волаш дӏахьош йола из спектакль хетаяь я Сийлахь-боккхача Даьймехка коталон 81 шу дузаш хилара, иштта Россе халкъа цхьоагӏон Шу белгалдеш. Театра кхоллама тоаба хьежар из истори хьакхолларал совгӏа, пьеса турпалхошка гӏолла дӏагойта, цу эггара халагӏча ханашка, къаман бала тӏабенабар аьнна ца бохаш, вай къаман нах хьаькъалца, деналца мишта хилар.
Айдамара ялх воӏа, денал а сий а долаш, шоай дас даь хьехар цу халача тӏема шерашка мишта кхоачашду гойтаргда наха. Чахкенаькъан Саӏида ший пьесага гӏолла гойтар гӏалгӏай маӏанах, кхалнах цу хана шоай дикагӏа йола оамалаш гойташ, беха боацаш хилар.
«Къонгаш бовча хана» - из баркал алар да шоай вахар вай мохк бахьан долаш дӏаденнарашта, цо хьагойт иштта лоархӏаме хилар вай хургдар лорадеш бейнарех бола дагалоаттам», - аьлар «Сердало» газетага Гӏалгӏайчен Паччахьалкхен драмтеатре.
Чахкенаькъан Саӏида язъяь «Къонгаш бовча хана» яха произведени я эггара езаш наха тӏаийцача классиках, из я иштта къаман театра исторе чӏоагӏагӏа йола спектакль. Драматурга говзал йолаш дувзаду гӏалгӏай дезала истори дерригача къаман вахарца, цо гойт эздела-этнически оагӏув. Эздела кӏийле йохаяра мел дукха халонаш духьалъяьлар.
Цу кхоллама балха чуйоагӏаш я къаман оамал, цо белгалду ший декхар кхоачашдеш хилар, из ноахалга кхачар. Гӏалгӏай паччахьалкхен, Боазаркъанаькъан Идриса цӏерагӏча театро из пьеса байнача турпалхой сий малхадоаккхаш, Котало гаргайоалаеш, моастагӏа юхатохаш цаӏ хинна эттача дерригача халкъа барт хилар белгалдеш оттаяьй.
