«Вай заман гӏулакхаш» яха спектакль гойтар гӏалгӏай кагирхой театро
Къилбаседа Кавказерча доагора- энергетически колледжа студенташта, хьехархошта «Вай заман гӏулакхаш» яха спектакль гойташ хилар Гӏалгӏай кагирхой театра актёраш. Тайп-тайпарча авторий пьесайх вӏашагӏъелла я спектакль. Таханарча ханацара гӏулакхаш гойта аьттув баьлар актерий.
«ӏадатех, сага вахарерча гӏулакхех дувца, гойта йиш яр цига. Кагирхой оаха гойтача балха раьза болга гуш дар», - дийцар «Сердалога» цу юкъе хиннача актёраша.
Спектакла хьалхарча даькъе йижар «Цех» яха Чахкенаькъан Саӏида пьеса я. Сага вахаре, оамалашца нийслуш долча хӏамаех дувц цига, белам юкъе болаш. Геттара дог гӏоздаьнна, белаш бар хьожаш хиннараш вахаре хӏара дийнахьа нийслуш дараш тахан сцена тӏа гуш.
Спектакла шоллагӏа дакъа Ахмадовгӏар М. цхьан актах латтача «Хьаста юхе» яхача пьесах латташ да. Селханарча, таханарча вахара денош духьалъувттадеш, оттабаь болх бар из. Белгалде деза, каст-каста вай кагирхой деша багӏача моттигашка вахарера лоархӏаме дола хӏамаш гойташ йола спектаклаш хьокхар къонабарашка дуккхача хӏаман уйла яйташ долга.
