Гӏалгӏайчен ший лоӏамагӏа латача спортсменаша толамаш даьхар, дунен кагирхой хьалхале дӏахьоча
Гӏалгӏай ший лоӏамагӏа волча латархочо Хоаной Мухьмад-Тӏахӏира дошо майдилг яьккхар, кагирхой дунен Хьалхален (U-23) спортивни яхьашка. Уж яхьаш дӏахьош яр американски Лас-Вегасе. Гӏалгӏайчен ший лоӏамеча латара ишкола викало лакхача боарам тӏа гойтар 97 кг дозал долча даькъ тӏа ший спорта говзал.
Шийца яхьебаьннарашца къовсам дӏахьош, Хоаной Мухьаммад-Тӏахӏир лата везаш хилар яхьий фусам-даьца - американски спортсменаца Рейдмэчер Джастинаца. Из латар чакхдаьлар вай лоӏамхочунгахьа совле йолаш 9:7. Гӏалгӏайчен спортсмена карагӏдаьлар ший латара говзала из мутӏахьа ве, юххера секундаш чакхъяллалца из цу боарам тӏа лоаттавеш, дунен чӏоагӏагӏвар яха цӏи шийна тӏехьа йита.
Дунен хьалхален яхьаш дӏахьош хинна тӏеххьара ди пхе даькъа дийкъар. Из хилар ерригача Россе тоабанна лоархӏаме. Российски шоай лоӏамеча латархоша США халкъашта юкъера яхьаш дикача толамца чакхъяьхар, цар цига ворхӏ совгӏат даьккхар - диъ дошо, шиъ дото, цаӏ борза.
Хоаной Мухьаммад-Тӏахӏира дошо котало яьккхар, чемпионата чакхъяьлар хьал сийрдадоаккхаш хилар, цо лоархӏаме дакъа юкъе дера Россе тоабанна, цунца цхьана гойтар дунен майдан тӏа гӏалгӏайчен ишкола низ.
