Гӏалгӏай метта хьал дийцар герга истол дӏахьош
Тов бетта 8-ча дийнахьа филологически факультете «Гӏалгӏай мотт, дош: дийна ӏадат» яха герга истол дӏахьош хилар хетадаь дар Российски Федераце къамий меттай Денна. Из кхетаче вӏашагӏъеллараш яр гӏалгӏай метта, филологически факультета студентий ӏилман юкъарлонца цхьана, литературани багахбувцамеи кафедраш.
Цига дакъа лоацаш хилар факультета хьехархой, студенташ. Уж бар Овшанаькъан Э.А., Йовлой А.М., Оздой Э.Г., Новразанаькъан М.М., Доврбиканаькъан Х.Х., Мутаӏаланаькъан З.М. иштта студенташ Йовлой Муса, Лоалахой Динара, Овшанаькъан Хади, Пхьиденаькъан Хадижа.
Йийца керттера тема яр дӏахо гӏалгӏай мотт дегӏабоалабарца, из лорабарца ювзаенна. Доакъашхоша белгалдир таханара метта хьал, из бувцара юкъе нийслуш дола хаттараш, кагирхошта юкъе из дукхагӏа лелабара йолча таронех.
Къаьстта йола терко тӏаяхийтар гӏалгӏай мотт дӏахо дегӏабара. Доакъашхоша шоашта цу хьакъехьа бакъахьа хетар аьлар, из кагирхой теркам тӏабодаш хилийтара де дезар белгалдир.
Кхетаче дӏахьош тайп-тайпара чулоацам бола докладаш йийшар Новразанаькъан М.М. Цо дийцар гӏалгӏай меттала бувзамашка гӏолла го йиш йолаш проекташ хиларах. Доврбиканаькъан Х.Х. «Архетипаш багахбувцама юкъе» яха тохкам гойтар.
Мутаӏаланаькъан З.М. къамаьл дир таханара гӏалгӏай метта хьал белгалдеш йола социолингвистически тохкам барах йола материал гойташ. Йовлой М.М. дийцар гӏалгӏай мотт, литература дегӏадоаладара Центро де лерхӏачох.
Лоалахой Д.И. белгалдир кагирхошта юкъе тахан гӏалгӏай мотт кӏезига бувцаш хиларах. Овшанаькъан Х.М. белгалдир гӏалгӏай нартски эпосерча Сеска Солса кепах, цунна чудоагӏача гӏулакхех лаьца. Пхьиденаькъан Х.М. гойтар, гӏалгӏай халкъа багахбувцама дукха чулоацам болча сюжета тохкама болх.
Герга истол дӏадахьар накъадаьлар студенташа профессиональни къамаьл дара. Доакъашхоша белгалдир, гӏалгӏай мотт лорабаь а ца ӏеш, из таханарча дешара, ӏилман таьрахьий таронашка хила безилга.
