Гӏалгӏайчен МЧС инспектораша берашта хьалхадаьккхар хих лорадалар
Ара йӏовхал эттача, бераш каст-каста хи тӏа долхаш, кхерамзлен бокъонаш йицлуш хул. Из унзара хьал юхатохара Гӏалгӏайчен МЧС ГИМС инспектораша болх дӏабихьар Гӏажарий-Юрта Эсан йистошка. Хьехама болх дӏахьош дакъа лоацаш бар полице болхлой, моттигерча администраце викалаш.
«Хьалхарча аргӏагӏа терко тӏаяхийтар кхувш боагӏарашца къамаьл дара, царна хьалхадаьккхар хих лорабалар лоархӏаме долга. Берашта дийцар, боккхагӏчар терко йоацаш, хи чу цабалар. Нагахьа санна чоалхане хьал этта моттиг хилча, де дезар белгалдир», - аьлар «Сердало» газетага Гӏалгӏайчен МЧСо.
Цу тайпара болх дӏабахьар лоархӏаме да. Аьхки ара йӏовхал эттача, берригаш а хин йисте салаӏа ловш хул. Цхьайолча хана берашта ховш хилац шоашта фу карагӏдаргда, цудухьа нийслу уж кхерамеча хьале. Царна йовзийта еза лаьрххӏа йола бокъонаш, хи йисте нийсделча, сих ца луш, шоай вахар лораде дезилга хьалхадаккха деза.
