Туристий Гӏалгӏайченцара безам дегӏабоагӏаш ба
Туристий оагӏорахьара Гӏалгӏайченцара безам лакхлуш боагӏа хӏара шера, яхаш, дийцар «Сердало» газетага ГӏР Кулгалхочун зарбан болх лелабераша.
«2025 шу лоархӏаме хилар Гӏалгӏайчен туризм дегӏайоалаяра. Карарча шера дукха хӏама даьд наькъахошта аттагӏа хургдолаш. Хьадийллад керда наькъаш, салаӏа моттигаш, хоза проекташ хьакхоллаш бола нах юкъебаьннаб», - аьлар республикан кулгалхочо Келаматанаькъан Махьмуд-Ӏаьлас, ГӏР туристий даькъ тӏа дӏахьоча балха мах оттабеш.
Халкъа программага гӏолла хьаденна 23 млн сом хилар бахьан долаш, Гӏалгӏайче йоккхий, безам тӏабодаш йола кхетаченаш дӏайихьар: «Шалта» яха фестиваль, «Фусам-нана» яха яхь, дезалца дувзаденна боламаш. Цар лоархӏаме тӏаэзар вай мехка керда хьаьший, таро хилар хьамсарча мехкара ӏадаташ, культура царна гойта.
Лоархӏаме да республике туризм дегӏайоалаяр, хӏама довзара оагӏоний наькъаш хьакхоллар, цу наькъ тӏа хӏара туриста безам хургба ГӏР дагалоаттама моттигаш го.
Цу балхах дувцаш, ГӏР кулгалхочо Келаматанаькъан Махьмуд-Ӏаьлас белгалдир, туризм дегӏайоалаяра даькъ тӏа керда толамаш доахаргхиларах ше тешаш ва, аьнна. Гӏалгӏайче даим кийчбу лакха говзал йола болхлой, дикагӏа йола туристически балха говзалаш лелае ховш ба уж. Республика дика дакъа лоацаш я йовзаш йолча кхетаченашка, гойтамашка, дуненна ше дӏайовзийташ, иштта кхычаргара а балха говзал хьаэцаш.
