Вай мехкарча МВД болхлошта дов даь 22 шу даьннад
2004-ча шерарча аьтинга бетта 21-ча бийсангара 22-ча денга кхоачаш, вай мехка цхьаккха адамал доацача зуламхоша даь хатар цӏаккха а дицлургдарех дац.
Ший къамаьла юкъе вай мехкадас Келаматанаькъан Махьмуд-Ӏаьлас белгалдир, цхьатарра МВД моттигашка, нах бахача чухьалхар ерригача Къилбаседа Кавказера хьал толхаде аьнна даь хӏама долга. Из зулам бахьан долаш 100 совгӏа болча наьха вахар хаьдар, царна юкъе дукхагӏбараш ӏаьдала болхлой бар. Иштта байра кхыбола нах а.
«Дерригача гӏалгӏай къаман боккха ӏоткъам хинна, ханаца ерзаргйоаца чов йита ди хилар цох. МВД болхлой, иштта кхыбола нах деналца духьалъоттарах, бӏехача зуламхоша лаьрхӏа хиннар чакхдаьланзар.
Майралца цу халача деношка духьалъэттарий цӏераш къаман исторе массахана яхаргья», - белгалдир вай Мехкадас. Из доккха хатар хинна 22 шу даьннадале а, дега хинна човнаш ерзаш яц.
Вайна цӏаккха а бицлургбац зуламхошта духьале яьраш, цар лаьрхӏа хиннар чакхцадалийтараш. Из тайпара зулам кхы цӏаккха а оттаргдоацаш къахьега деза вай массане. Дала къахетам болба, Дала гешт долда байнарашта, бийрза моттиг Дала даькъалайойла цар!
