Наггахьа мара нийслуш доацача лазарашта лаьрхӏа вай мехка моттиг хьайийлла шу даьннад
СКФО эггара хьалхара, наггахьа мара нийслуш доацача лазарий моттиг вай мехка хьайийлла шу даьлар. Из хоам «Сердалога» бера цу оагӏонцарча министерствера.
«Наьсарерча берий поликлинике хьайийлла йола из моттиг чӏоагӏа эшаш яр вай мехка. Наггахьа мара нийслуш доацача халача лазарех дола бераш леладеча дезалашта лоархӏаме хилар из гӏулакх.
Уж тайпара лазараш дукхагӏча моттигашка сага овлаца гаьннара хьадоагӏаш хул, дукха мах бола молхаш эшаш, йӏаьхача хана дарба де дезаш лазараш лоархӏ царех. Хьалхагӏа федеральни оагӏонца дӏахьора дарба, хӏаьта тахан вай мехка йолаш я из моттиг», - йоах тхогарча хоамо.
Цу моттиге къахьегаш ба лакха говзал йола лораш, дийнахьа ӏовижа дарба де аьттув ба цига. Хӏаьта эггара лоархӏамегӏа да, лазар хӏетта хьакхийттача хана гучадаккха аьттув хилар.
Карарча хана вай мехкара цига тӏахьожам бераш 110 бер да, дӏадахача шера генетически оалача тохкамга гӏолла гучадаьлар, наггахьа мара нийслуш доаца лазараш кхийтта кхы а пхи бер долга. Геттара лоархӏаме да цу берашта эшаш йола молхаш хилийтар.
«Камоаршала го» яхача паччахьалкхен ганзага гӏолла 26 бера тахан вахаре лоархӏаме йола молхаш лоаттаю. Могаш боацараша ханнахьа дарба дӏадоладергдолаш, болх лоаттабу цига.
