Российски Федераце прокуратуран сийлен Книжка тӏа дӏаязваьв
Къоастой ӏийса хургва Российски Федераце Прокуратуран сийлен Книжка тӏа - Гӏалгӏай Республикан кулгалхочо Келаматанаькъан Махьмуд-ӏаьлас ший Телеграм-канала тӏа кхайкабир республикан бахархошка из дика хоам.
«Из кхетаче дӏайихьар селхан Москве, прокуратура 304 шу дизар дездеш. Из совгӏат боагӏаш баь лерхӏам ба, дукхача шерашка дика ший болх дӏахьош хиларах. Махьмада ӏийсас 34 шера къахьийгар прокуратуре, тохкамхочун балхагара дӏаволавенна, Российски Федераце Керттерча прокуратурага кхаччалца. Из ший декхар сий долаш кхоачашдеш хьавенав, бехктокхаме волаш, из совгӏат цун тешал деш да, - аьлар Макшарипа Махьмуд-ӏаьлас, цу дикача хоамах дувцаш.
Цо иштта белгалдир, из везвеш хинна кхетаче яьнначул тӏехьагӏа, цунца шоай вӏашагӏкхетар хилар, Гӏалгӏай Республикан, РФ Президента чувоагӏача массазарча викала фусаме, иштта из даькъалавувцар цу дикача хоамаца.
«Цун профессиональни говзалца цхьа ноахал кхедаь ӏийнабац, са советник волаш цо декъ шийна ховш дар. Махьмада ӏийса могаш, маьрша вахалва, дӏахо а ший балха тӏа толамаш доахаш! Оаха доаккхал ду цун толамех», - аьлар Мехкадас.
Гӏалгӏайчен Кулгалхочо хьалхадаьккхар, цу боахама кхо бӏаь шу ха йола исторен оагӏонаш гойташ долча Сийлен книжка тӏа, прокуратура дукхача болхлой цӏераш хилар, уж ба шоай хьамсарча мехка хьашташ кхоачашдеш хьабоагӏараш.
«Къаьстта баркал оал Российски Федераце Керттерча прокурора Гуцан Александра, цу Сийлен книжка тӏа гӏалгӏай къаман цаӏ мара воацача викала Къоастой ӏийсайна иштта лакха мах оттабарах», - аьлар Гӏалгӏайчен Кулгалхочо.
