ИТ- оагӏонца хоалуш дика хувцамаш да
Хоамий технологей оагӏонца мехка дикка толамаш да ала йиш я тахан. Дуккхача къонабараша хоржаш бола, шоай хӏама цига чӏоагӏдеш бола никъ ба из.
«Программированех хӏама ховш доаца бераш, кагирхой ба «21 Ишколе» ӏомабераш. Деша безам барашта керда хӏама довзийташ, тахан мехка геттара лоархӏамедарашцара кхетам лакхбеш йола моттиг я ала деза цох. Массехк оагӏонна юкъера шоашта дикагӏа «дӏадохьалургдар» хьахаржа йиш йолаш ба доакъашхой: программировани, киберкхерамзле, биоинформатика, ИТ-проекташта доал дар, иштта кхыдараш а.
24 сахьата болх дӏахьоча цу моттиге къахьега йиш йолаш ва саг; деша вагӏа, балха ва аьнна доацаш. Ма дарра аьлча, шийна аьттув бола ха хьахаржа йиш я цун. Хӏаьта кхыча мехкашкара кхаьчарий мах боацаш баха аьттув ба цига», - дийцар тха газетага мехкадаь зарбан болх лелабераша.
«Мехкарча кагирхошта доагӏаш да ер къамаьл! «21 Ишколе» дӏаоттара болх чакхбоалаш латт. Дукхача хана денз, ИТ оагӏонца дувзаденнараш довза ловш шо хиннадале, хӏанз дика аьттув ба шун хьалхара гӏа баккха. Цунга гӏолла доккхий хувцамаш хила тарлу шун вахаре. Мехка кхыча республикашкара кагирхой а тӏабех цига деша.
«21 Ишколе» дешаш тахан Россе тайп-тайпарча моттигашкара къонабараш ба. Керда хӏама довзарал совгӏа, шоаш санна барашца доттагӏал тасса, ӏомадаьр дӏа-хьа эца, ИТ- оагӏонца цхьа дакъа хьаллоацаш хила аьттув ба къонабарий», - аьлар вай мехкадас Келаматанаькъан Махьмуд-Ӏаьлас.
