Дунен Чемпионата 2026 шера хьалхарча бӏала чаккхе
Дунен Чемпионата 2026 шера Хьалхарча бӏала чаккхе е еза ха хьакхаьчай. Хӏанз укх сахьате, вӏашагӏтеха тоаба ший цӏи чӏоагӏъеш я, бакъда цхьацца долча толамаша хьагойт хувцамаш хургдолга.
Хьалхарча бӏала ловзарашка гуш хилар яхьа даьша тешшаме котало йоаккхаш хилар: СШАас эшайир Парагвай, чот 6:0 йолаш. Мексика тешшаме котъяьлар ЮАРал, чот 2:0 йолаш. Белгалде деза исторически хьал: Вилтон Сампайс, кхозза кхелахочун цӏе карточка гойта, ловзара юкъера арабаьхар гӏалатбаьннараш. Канаданна а шийх дог лазараш гӏадбига маганзар, уж лайзар Боснеца Герцеговинаца, цхьаккха кот ца воалаш чакхдаьлар вӏашагӏкхетар. Чот 1:1 хилар.
Германе эшабир Кюрасао гулъяьча тоабан ӏомалураш, чот - 7:1. Ингалсий мехка, Хорвате ловзар чакхдаьлар, чот 4:2 йолаш. Белгалде дезаш да, «Кхаь лома» хоза ловзар. Цу тайпара хӏама ингалсашта ца гу дукха ха яр.
Французаш котбаьлар Сенегалал - 3:1. Киллиан Мбаппе тоабанна ловзар дика чакхдаьлар, цо ше чутехар ши бургац.
Кхоачамбоацар юкъе ца эккхаш хиланзар. Европан чемпионашта Испанена маганзар Кабо-Верде наӏарашка бургац чуяккха. Тамашийна ловзар гойтар 40 шу даьннача Кабо-Верде наӏараш лораеча Возиньяс. Испанций ловзар цар мехкахой башха раьза болаш дӏахьош дацар.
Иштта хьалхарча туре аьттув боацаш лайзар Португалера тоаба. Криштиану Рональду тоаба ДР Конгона духьала чот хьайийллар, 6-гӏа минот йолаш. Из дир ПСЖ полузащитника Жоау Невеша. Бакъда цунна жоп делар, кхы гаьна ца доаккхаш. Уж тоабаш лайзар цхьаннегахьа а котало йоацаш - 1:1.
Белгалдаккха безам ба вахара бувзамашка Криштиану тоабанхой раьза боацаш хилар, бургац чуяккхара толам шоашкахьа совле йолаш хила беза, яхаш.
Юххера а, белгалдаккха безам ба Аргентинай Алжираца хинна ловзар.
Аргентинай хьалхарча жӏака тӏа ловзаш волча Лионель Мессе цу вӏашагӏкхетара кхелл ший караийцар. Цо бургацаш чуяьхар 17-гӏа, 60-гӏа, 76- гӏа миноташ йолаш.
38 шу даьннача аргентинхочо дунен Чемпионате боаккхаш хинна хьалхара толам бар из. Хӏанз цун 16 чутеха бургац я дунен ялх Чемпионате. Шоллагӏча мугӏаре ва бразилец Роналдо (15), кхоалагӏа- француз Килиан Мбаппе, иштта немце Герд Мюллер (14).
Месси чота тӏа ерригаш а 120 чутеха бургац я, иштта 64-зза толам болаш бургац дӏаялар да, 200 ловзара юкъе Аргентинай вӏашагӏтехача тоабанца хиннав из.
Хамхи Дени
