Гӏалгӏайчен хоржамий комиссешта эшаш дола новкъостал дергда
Гӏалгӏайчен Мехкадаь, Паччахьалкхен Администраце кулгалхочо Мархенаькъан Анзора дӏайихьар балха тоабан кхетаче. Из лаьрхӏа яр хоржама комиссена новкъостал дара. Кхадж тассара денош долаш де дезар хьалхадоаккхаш яр кхетаче. Белгалду, РФ ӏХ-ча кхайкарала Паччахьалкхен Думан депутатий, Vӏӏӏ кхайкарала Гӏалгӏайчен Халкъа Парламента хоржамаш хургда карарча бетта.
«Кхетаче дӏахьош ладийгӏар кхадж тассара яьча кийчонга, цу гӏулакха бехктокхаме болча наха еча докладашка. Къаьстта йола терко тӏаяхийтар дика лелалуш боаца бахархой хоржамий даькъ тӏа хьабахкара ӏалашо яра, иштта нахага хоамаш дӏакхачийтара. Дӏахо дийцар юкъарлон тӏахьожам хила беза дош. Цу даькъ тӏа хьоахадир ма хулла дукхагӏа юкъарлон тӏахьожамхой хилийтар, из болх цӏена дӏабахьар. Кхетачен чаккхе еш, Мархенаькъан Анзора хоадам боллаш декхараш тӏадаьхкар цу гӏулакхах бехктокхаме йолча моттигашта», - аьлар «Сердало» газетага Гӏалгӏайчен Паччахьалкхене.
Мархенаькъан Анзора белгалдир из гӏулакх оттаяьча планах дӏадахьар лоархӏаме долга, цо аьлар ӏаьдала болхлой оагӏорахьара новкъостал даро Паччахьалкхен дума ӏХ-ча кхайкарала депутаташ, Vӏӏӏ-ча кхайкарала моттигера Парламент харжар лакхача боарам тӏа дӏадахьа таро хургья.
«Вай юкъара декхар да - дийлла, бокъон тӏехьа, къаьга хоржамаш дӏадахьар, наьха кхадж тассара лоӏам лакхача боарам тӏа а хургболаш», - аьлар цо.
