Цӏихеза суртанча къонача начӏал дарашта говзала къайленаш йовзийташ хилар
18.05.2026 22:16
Россе суртанчий Союза мехкарча оагӏон кулгал деча Поаланкой Заьлмахас, ший балхацара говзал йовзийташ, кхетаче дӏайихьар Наьсарерча берий исбахьален ишкола доакъашхошца. Начӏал долча суртанчаца ха яккха йиш хиларах, берашта доккха совгӏат хиннадар.
«Сердалога» шахьарерча ДХШ дийцачох, иштта йолча кхетаченаша дикка пайда боаржабу. Воккхача суртанчан балхацара къайленаш йовз царна, иштта моллагӏа хаттар дашха аьттув хул цунга гӏолла.
Геттара шера дола хӏама юххьанца кӏада тӏа мишта ӏотӏадилла деза, сурт баьде хеталургдоацаш малагӏа говзал юкъейоалае еза, иштта кхыдараш а довзийташ хилар цу дийнахьа Поаланкой Заьлмаха берашта. Ӏалама сурт бокъонца волча суртанча бӏаргашца мишта хила деза дӏагойташ урок дӏайихьар цо берашца.
