Безами кхели
Йоазонхочун Булгучанаькъан Мурата романа хьакъехьа
Укх деношка, Наьсарерча «Пилигрим» яхача типографе кепа а теха, арадаьннад Россе йоазонхой цхьанкхетара доакъашхочун Булгучанаькъан Мурата «Безами кхели» яха роман. Мурат духхьал йоазонхо санна вайза ца ӏеш, вай мехка вовзаш ва экономически ӏилмай доктор, профессор, ИнгГУ хьехархо санна. Цо дукха ӏилман балхаш яздаьд, исбахьален литературанна юкъе романаш, дувцараш, байташ кхеллай. Мурата къахьегам белгалбаьккхаб «Карахдаьннарех» яхача моттигерча орденца, из ва къахьегама ветеран.
«Безами кхели» яха роман пхезлагӏа арадоалаш да, эрсий меттала из арадаьннад 4-зза, хӏанз гӏалгӏай меттала 5-лагӏа арадаьннад дувцаш дола книжка. Цунна таржам даьр автор ше ва. Эрсий а гӏалгӏай а мотт ховш ва йоазонхо.
- Сенах да хьа книжка? – аьнна, хаьттар аз Муратага, из газета редкце чувена волаш.
-Ер книжка аз яздаьд вай даьша, даь-даьша, даь-ноаноша леладаь хӏамаш дувцаш. Уж дукхагӏча даькъе дувзаденна да вай Сибре дигале, дигачул тӏехьагӏа а хиннача моттигашца. Цӏадаьхкачул тӏехьагӏа хиннараш а дувц книжка тӏа. Цхьаккха тайпара идиологеца дувзаденна а кхыча къамех дувцаш а моттигаш яц романа тӏа. Гӏалгӏаша а орстхоша а леладаь хӏамаш, хинна юкъамоттигаш я ювцараш. Цкъаза уж къеста ца бе вайнах оалаш а моттигаш нийслу аз.
- Безам хьехабу хургба-кх ӏа укх тӏа дукхагӏа…
- Книжка дӏадолалуча яздаь да: «Укх романо чулоац массе оагӏорахьара вайнаьха этносий кӏоаргача вахара хьал: хьаькъал, денал, хьинар, шоашта юкъе а кхыча къамашца а лелабу барт. Тӏаккха мара хилац маӏачох къонах, кхалчох сув.
Керттера турпалаш ба – дегаш дизза шоайла догдоаха йоӏ Залии зӏамсаг Тӏахӏири…»
Гӏалгӏай меттала яздаь шоллагӏа книжка да автора вай дувцаш дола роман. Хьалха арадаьннадар «Дувцараш, байташ, иллеш» яха книжка.
Наха дезалуш книжка хилда Мурата гӏалгӏай меттала яздаьча романах.