Дешара мах бу денош
Ишколашка дӏайолаеннай экзаменаш
Ахкан хьалхарча деношка дӏайолаеннай вай республике ишкол яьккха баьннарий экзаменаш, цхьачарна уж я 11 класс, вокхарна – 9 класс. Йизза ишкол яьккхарашта моттигаш кийчъяьй экзамен дӏаяла, цунга хьалххе кийчо яра болх дӏабихьаб республике. Вайна дагадоагӏа «ЕГЭ дӏалу даьшца-ноаношца» яха болх чакхбаьккха. Цу хана боккхагӏчарна дайзар мишта, мича дӏалургья шоай бераша лоархӏаме экзаменаш, цар чоалхане а хала а хилар, фу де деза экзамен дӏаяла кийчлуча сага. Цу тайпарча ӏомабалара балхо дикка гӏо ду, хьакхаштавоаккх дешархо хургйолча экзаменца, психологически оагӏорахьара кийчву из эгаш, кхераш волча моттигага. Цул совгӏа, экзамен дӏалургйола майдаш кийчъяьй мобильни хоамаш чакхдаргдоацаш, дуача хӏаман ӏалашо ярца. Чакхъяьккхай болхлой аттестаци, вӏаштӏехььяьккхай хоамаш дӏалургдола оагӏув.
Шу дӏадоладелча денз, экзамен дӏаяла ӏомалуш дола балхаш даьд эрсий меттах, доазол арахьарча меттаех, информатиках, географех. Царна юкъе дакъа лоацаш хиннав 2300 саг. Цу балхага хьехархой говзал лакхъяра институте кийчваьв экзамен дӏалургйолча майдай 20 кулгалхо, ГЭК 50 доакъашхо, ӏилмаех йолча кхелий 200 доакъашхо, 1100 болх дӏахьоргбараш, иштта кхы дӏахо а. Экзаменаш дӏаяла езаш дӏаязваь ва 3800 саг, царех 500 ОВЗ долаш ва. Экзаменаш дӏахьоргья аьтинга бетта 1-25 деношка.
Иштта укх деношка ОГЭ дӏалуш ба 9 класс яьккхараш а, царех цхьабарашта цох тӏеххьара экзамен хургья, дуккхабараш дӏахо колледжашка деша баха тарлу. Шоллагӏдола дешархой дакъа ишколе юхадоагӏаргда, гуйран хьалхарча дийнахьа, дӏахо а 10-11 классашка деша дагахьа. Цар экзаменаш яла езаргья эрсий меттах, биологех, географех, математиках, доазол арахьарча меттаех. Уж экзаменаш дӏахьош хургья аьтинга бетта 2-19 деношка. Бераш дӏакхувларгда цу гӏулакха лаьрххӏа кийчъяьча ишколашка. Хӏаранена къаьгга гуш хургда ше мишта дийшад ишколе яьккхача хана, е зехьа ха йоаеш ваьгӏав, дешарца чам боацаш. Дешархочоа ховчун боаггӏаш бола мах бергба цу гӏулакха тӏахьажа оттабаьча наха.
Дешархой аьттув балба экзаменаш дӏаяла!
