Наьна мотт мишта хов техкар ишколашка
Массане юкъара диктант яздарах
Гӏалгӏай метта хетадаь итт ди долаш, моттигерча дешареи ӏилмани Министерствос ишколашка чакхдаьккхар массане юкъара диктант. Из язде декхарийла бар 8-11 классашка багӏа дешархой. Саькура бетта 24-ча дийнахьа язде дезаш хиннача диктанта текст хьаийцаяр халкъа йоазонхочун Боканаькъан Ахьмада «Цӏийенна сайре» яхача романа тӏара. Цу тайпарча диктанто дика гучадоаккх, малагӏча боараме хов дешархошта шоай къаман каьхата мотт, дӏахо дукхагӏа теркалде дезараш малагӏаш да, из мотт ха беззача тайпара ӏомабара. Цул совгӏа наьна меттацара бувзам а безам а чӏоагӏбу цу тайпарча йоазон балхо.
Дувцача кепара диктант язде вӏашагӏкхийтар Сурхо тӏарча 9 шера дешача ишкола хьехархой а дешархой а. Цхьа 8-гӏа, ши 9-гӏа классаш яр из язде дезараш. Дешархоша сакъердамца язбир из болх, къаьстта а шоашта фу карагӏдоал довза ловш. Цул совгӏа, тайп-тайпара ӏилмаш хьеха хьехархой а безам хилар цхьан хана шоашта ишколе ӏомадаьр мишта дагадоагӏа тахка.
Дукха хӏама дар укхаза лораде дезаш: дожарий кепаш, доалара цӏераш, сецара хьаракаш, хоттаргаш, чоалхане а цхьалха а предложенеш, кхыдараш. Йоазон болх бешаш яр наьна метта хьехархо Дударанаькъан Байӏала Радимхан, балхаш тохкаш цунна гӏо дир хьехархоша Овшанаькъан Мухьмада Марема, Зангенаькъан Вахий Марета, Овшанаькъан Мухьмада Маккас, кхычар.
