Цу гӏулакха эша гӏирсаш дац
Нувхаш мича хьоргья хац, Наьсарен цхьайолча моттигашка
Укх деношка Мутаӏаланаькъан Хь-Б. цӏерагӏча Наьсарерча урам тӏа нийсвелар со. Из бӏаьхийча наьха урам аьнна цӏихеза моттиг я, хӏана аьлча цига дукхагӏа мел яраш тайп-тайпара вахаре эша хӏамаш йохка доалахьара тикаш я. Цул совгӏа, хӏара тиканна хьалхашка шишша-кхоккха машин а латташ хул. Из-м деррига дика дар, харцахьа хӏама дац цунца. Больницера ӏоэгӏаваьнна, къаьнара автостанци йолчахьа ӏовоагӏар со, аьтта оагӏорахьа гӏолла. Цу хана сона духьалкхийтар бейоахкаш цхьацца кег-мег нувхаш йолаш вола къонах.
- Ераш ӏочукховса моттиг яц-кх укхаза, - йоахар цо, шийх бетталуча нахага, цар из моттиг хьалахарга сатувсаш мо. Айса ӏобенача новкъа юхахьежар со, амма цхьаннахьа латташ нувхашчутувсаргаш йовнзар сона. Тӏаккха айса ӏо мел бахьача новкъа а хьежар со, цу тайпара яьшкаш латт е латтац. Гуш хӏама дацар. Кхерамзленна йитайий-те ца оттаеш, аьнна, хийтар сона, воча наха цар чу наькъа йисте эккхаргйола хӏама чуйоллар кхераш. Кӏеззига гаьнагӏа цаӏ е шиъ оттаяьяларе хӏама-м дацар. Цул совгӏа, уж ӏаьдало оттаярга а хьежа безацар. Бизнесменех хьалйизача улица тӏа уж оттае фу хала да. Шинне-кхаьнне шо-шоай тикашта хьалхашка ӏооттайича а кхоачам болаш гӏулакх да-кх из. Кхы вӏалла деце а, гӏаьлений юхкаш, яьга цӏилеторгаш, морожне тӏара е «Баунте» тӏара каьхаташ чукховса накъаяргьяр. Тӏаккха гӏалий тӏара бахархой а хьаьший а леларгбацар, «нувхаш чутовса моттиг а яц укхаза-м», яхаш.
Кхыча шахьарашка-м шоай тикашта гонахьара доазонаш а тоаду царна доал деча наха, нувхаш чутувса яьшкаш-м цар цхьаккха хало йоацаш оттаяйтаргьяр.
