лашта паччахьалкхен совгӏаташ дӏалуш хилар вай Мехкадаи Евкуранаькъан Ювназ-Беки
Украинерча тӏема операцена юкъе дакъа лоацаш вахар хаьдача бӏухой нахага паччахьалкхен совгӏаташ дӏалуш кхетаче дӏайихьар Магасе. Россе Президента Путин Владимира хьожаяь орденаш, майдилгаш тӏема аренашка вахар хаьдача турпалий цӏагӏарча нахага дӏалуш хиннараш бар вай мехкада Келаматанаькъан Махьмуд-Ӏаьла, РФ герзашцарча низий Министерствон кулгалхочун гӏонча, эскара инарал Евкуранаькъан Ювназ-Бек.
Денал, майрал гойташ; шоай декхараш дизза кхоачашдеш лаьттача вай мехкарча шийтта сага Денала орденаш, Георге орден, иштта Суворова, Жукова майдилгаш елар. Зале хиннача байнача бӏухой даьй, ноаной, цар истий, берий дог тедеш, цар гӏайгӏа берригача къаман гӏайгӏа йолга белгалдеш, къамаьл дир вай мехкадас Келаматанаькъан Махьмуд-Ӏаьлас. Иштта теркалдир, яхь йолча, майралах бизза хиннача къонгий цӏераш къаман, боккхача мехка исторе массахана яхаргйолга.
«Тахан дӏаденнача хӏара совгӏата тӏехьа турпалал гойтача сага вахара никъ ба. Тахан вай массане кхетаду, дийца варгвоацаш, цхьаккха хӏаманца яйлургйоацаш йоккха гӏайгӏа, хало из йолга. Вай декхар да цу наьха цӏераш бӏаьшерашка яхийтар, бисарий дог хьастар. Тахан мехка кулгалхоша боккха болх бу тӏема аренашка вахар хаьдача бӏухой дезалашта терко лоаттеш, цар хьашташ кхоачашде хьожаш. Из гӏулакх лорадар тахан керттерча декхарех да республике», - белгалдир Мехкадас.
Даьхен гӏулакхе латташ, бейнарий цӏераш РФ, Гӏалгӏайчен турпалий исторенца яхаш хургья массахана.
