«Хьалхарчар болама» балхах дийцар Мехкадас
«Хьалхарчар болам» яхача моттигерча оагӏон доакъашхоша вай мехка тахан дӏахьоча балхах дувцаш, кхетаче дӏайихьар мехкадас Келаматанаькъан Махьмуд-Ӏаьлас. Россе Президента чӏоагӏонца хьабийллача цу оагӏонца тахан къонабарашца дӏахьош латтар боккха болх ба. Республике карарча хана оагӏон 252 моттиг я, 51 эзар совгӏа доакъашхо, 6,7 эзар гаргга хьехамчаш. Дешара, гӏо дара, спортивни проекташка дакъа лоацаш я тахан къона тӏехье.
«Дакъа лацарал совгӏа, хьехамчаш болаш вай къонабараша болх дӏахьош хилар лоархӏаме да сона. Мужече дӏахьош хиннача «Дикал Хьалхарчарца» яхача гӏо дерий кхетаченга гӏолла вӏашагӏкхетар дӏадахьа гӏо деш хилар дешархой цхьаццадараш шоашта хьатӏаийца. Дика масал да из! Ишттача гӏулакхашка гӏолла тоабанца къахьега, моллагӏа декхар кхоачашде кийча хила ӏомалу вай къонабараш. Къаьстта лоархӏаме да ахкан ха цхьацца гӏулакхаш кхоачашдеш дӏаяхьар. «Оаздик», «Къона мехкагӏча» яхача лагерашка «Хьалхарчар болама» белггала чулоацам болаш ханаш хилар. Проектни, спортивни, Даьхенцара безам чӏоагӏбарах болча балха юкъе дакъа лоацаш хилар къонабараш. Къаьстта терко йир «кхетам бала дӏаязбаь» латтача къонабарашта. Пайда беш ха дӏаяхьа йиш хургьйолаш цхьацца гӏулакхашта юкъелаьцар уж. «Бералла наькъаш» яхача оагӏонца дӏахьош болх ба из. Кхаь шера 2 эзар совгӏа кхетаче дӏайихьай гӏончаша, 84 дешархо вар дакъа лоацаш. Ерригача 126 гӏончаша болх дӏахьоча дешара моттигашка «Хьалхарчар болама» оагӏон кулгалхой болаш къахьег цар. 128 ишколе берий гӏулакха лаьрхӏа моттигаш хьайийллай; беро ше лаьрхӏар довзийта, доаржаде йиш йола оагӏув ба из», - аьлар вай Мехкадас.
Хьехамчий болх геттара лоархӏаме болгах дийцар республикан Кулгалхочо, «Россе аьрзелгаш» яха проект белгалъеш. 13 эзар совгӏа болча зӏамигача дешархошта хьехамчаш хинна латт лакхерча классашкара дешархой. Бераша шоайла боккха пайда боаржабеш хӏама да из! Йоккхача проекташка дакъа лоацаш ба тахан вай къонабараш. «Зарница 2.0» яхача ловзара юкъе 15 эзар совгӏа нах ба, республикера тоаба ерригача Россе хьалхарчарех я.
Тахан дезала юкъе, ишколаша, паччахьалкхено, юкъарча моттигаша цхьана дӏабахьа безаш болх ба из. Таханара дешархой, студенташ вай къаман кхоане я, цунга хьежжа шоашта декхараш дӏатӏаэца, дизза кхоачашде ловш, низ болаш хила беза уж, Мехкадас теркалдечох.
