Хий чудаьннача Паччахьалкхен архива гӏулакх меттадоаладе, аьнна, тӏадиллар Мехкадас
Реcпубликерча Паччахьалкхено тахан дӏайихьача кхетаче геттара чӏоагӏа доаржадаь дийцарех дар, Паччахьалкхен архиве хий чудалар. Кхоана ураоттаргйолча тӏехьенга дӏакхача деза дерригача къаман исторически лоархӏаме дола каьхаташ да лораде дезараш. Эггара хьалхарча оагӏонца, ха ца йоаеш, меттадоаладе дезаш гӏулакх да из, аьнна, белгалдир мехка кулгалхочо Келаматанаькъан Махьмуд-ӏаьлас.
«Гӏишлон хьал ма дарра тохкаш болх дӏахьо, аьнна, тӏадиллад аз цу оагӏонцарча болхлошта. Архива гӏишло 2002-2003-ча шерашка хьалъяь я. Тахан тахка деза, цу гӏишлон проект хьаоттаяра болх мишта дӏабихьаб, гӏишлон балхаш малагӏча боараме чакхдаьха да, тахан из хӏама нийсдалара бахьанаш сенца дувзаденна да. Мехкарча рузкъах хьалъяьча гӏишлошца, цхьа ха яьлча, терко ца еш дита кхоачамбоацараш, гӏалаташ гучадувлар, юххьанца лертӏа, боаггӏача боараме кхоачашдаь хила дезараш юха меттадоаладе ахча дӏатӏаахийта дезаш хилар иштта атта, тохкам ца беш дусаргдолаш дац»,- язду Мехкадас ший Телеграм-оагӏон тӏа.
Келаматанаькъан Махьмуд-ӏаьлас Паччахьалкхенна тӏадиллад из деррига меттадоаладара болх дӏаболабе, аьнна. Архива ганза кхерамзлен хьал меттадоаладе, из иштта нийсдалара бахьанаш тахка, дӏахо кхы из тайпара хӏама нийслургдоацаш, кхоачашде дезарий йист яккха езаш ба тахан мехка. Республикан кулгалхочо тӏахьожам беш гӏулакх да из тахан.
